12. des. 2005
John Lennon að seljast upp
Ævisaga John Lennon hefur farið vel af stað og síðustu vikuna hefur hún runnið út eins og heitar lummur. Bókin hefur mælst mjög vel fyrir enda einstaklega vönduð bók og algerlega ómissandi fyrir allt popp- og rokkáhugafólk. Fyrsta prentun er á nú þrotum en önnur prentun kemur vonandi fyrir helgi.
04. sep. 2005
Lagarfljót - Mesta vatnsfall Íslands komin út
Í gær kom bók Helga Hallgrímssonar náttúrufræðings, Lagarfljót - Mesta vatnsfall Íslands út. Haldin var útgáfuhátíð um borð í Lagarfljótsorminum þar sem bókin var kynnt með stuttri dagskrá á meðan siglt var um fljótið. Mikill fjöldi fólks sótti hátíðina í blíðskaparveðri og skemmti sér hið besta. Var það samdóma álit manna að bók Helga væri mikið stórvirki og hin glæsilegasta í alla staði.
12. maí 2005
Refskák fór beint í 3.sæti og Garðblómabókin heldur sínu striki
Refskák eftir Ian Rankin var þriðja mest selda bókin á Íslandi í síðustu viku og þarf það ekki að koma neinum á óvart. Bókin fjallar um leit hins sukksama Rebus að morðingja sem gengur laus í Edinborg. Hver unglingsstúlkan af annarri finnst kyrkt. En brátt kemur í ljós að illvirkinn á eitthvert erindi við Rebus, því honum berast undarleg skilaboð í hvert skipti sem nýtt morð er framið: bandspottar með hnútum og krossar úr eldspýtum. Hann skilur hvorki upp né niður og á meðan fjölgar fórnarlömbunum. Garðblómabókin lenti í fimmta sæti á metsölulistanum.
04. maí 2005
Garðblómabókin stökk beint inná metsölulistann
Garðblómabókin eftir Hólmfríði A. Sigurðardóttur sem kom út um síðustu helgi fór beinustu leið inná metsölulista Pennans-Eymundsson. Bókin er nú í 3. sæti á lista handbóka/fræðibóka og ævisagna og í 5. sæti á metsölulista allra bóka. Þessi velgengni þarf ekki að koma neinum á óvart enda um að ræða yfirgripsmikið og vandað ritverk uppá nær 500 blaðsíður með um 800 ljósmyndum. Og verðið ætti ekki að trufla neinn. Aðeins 3990.
20. apr. 2005
Tvær bækur á topp 10
Bjargvætturinn í grasinu er nú í fjórða sæti á metsölulista Pennans – Eymundsson og í öðru sæti á kiljulistanum, á aðeins eftir að skjóta Dan Brown ref fyrir rass. Það er greinilegt að Holden Caulfield á enn fullt erindi til fólks hér á landi ekki síður en annars staðar, en bókin hefur verið í stanslausri sölu um heim allan þessi 54 ár sem liðin eru frá útkomu hennar.
Með köldu blóði eftir Ian Rankin er nú í níunda sæti á aðallistanum og í fimmta sæti kiljulistans. Er greinilegt að Rankin nýtur vaxandi vinsælda og geta aðdáendur hans glaðst yfir því að í næstu viku kemur út önnur hörkuspennandi bók efir Rankin, Refskák.
13. apr. 2005
Bjargvætturinn á metsölulistann
Bjargvætturinn í grasinu eftir J. D. Salinger er kominn í 7. sæti á metsölulista Pennans – Eymundsson og 3. sæti á kiljulistanum. Bók Ian Rankins, Með köldu blóði er í 8. sæti á kiljulistanum. Eftir tvær vikur kemur út önnur kilja eftir Ian Rankin, Refskák, svo að hinir fjölmörgu aðdáendur þessa snjalla höfundar ættu að hafa eitthvað að iðja næstu vikurnar. Þess má loks geta að nýjasta bók Rankins, Fleshmarket Close, kemur út í íslenskri þýðingu hjá Skruddu í haust.
05. apr. 2005
Nýjar kiljur frá Skruddu
Í gær komu út tvær kiljur hjá Skruddu, annars vegar Með köldu blóði eftir Ian Rankin, en hún kom fyrst út á síðasta ári. Þá kom einnig út ný útgáfa af hinni frægu bók J.D. Salingers, Bjargvætturinn í grasinu en hún kom fyrst út á íslensku árið 1975 í þýðingu Flosa Ólafssonar.
27. nóv. 2004
Guantánamo komin út
Í gær kom út bókin Guantánamo - Herferð gegn mannréttindum eftir breska blaðamanninn David Rose. Í bókinni er fjallað um hinar alræmdu fangabúðir Bandaríkjamann á Kúbu. Í bókinni eru ógnvekjandi lýsingar á meðferð Bandaríkjanna á föngum sínum og sýnt er fram á að hér eru á ferðinni meðvitaðar aðferðir sem stjórnað er frá æðstu stöðum.
David Rose kemur til landsins á mánudaginn og verður hér fram eftir vikunni til að fylgja eftir útgáfu bókarinnar.
18. nóv. 2004
Ágúst Borgþór fær frábæra dóma
Páll Baldvin Baldvinsson fer afar lofsamlegum orðum um smásagnasafn Ágústs Borgþórs, Tvisvar á ævinni, í DV í dag.
Má af orðum gagnrýnandans skilja að bókin sé ein sú albesta sem hann hefur lesið í þessu jólabókaflóði. Páll Baldvin segir m.a.: „Ágúst er flottur höfundur og hefur náð ísmeygilegum tökum á þröngu og knöppu formi smásögunnar. Hann er snjall sögumaður, hefur augun opin fyrir hinum óvænta endi, getur auðveldlega dregið stór og mikil örlög saman á fáum síðum og er að segja meira en margir þeir menn sem leggja fyrir sig langhunda í skáldsöguforminu þessa
dagana.“ - Í niðurlagi dómsins kemst Páll Baldvin svo að orði:
„... hér er lifandi listamaður að starfi sem plægir sína jörð, sáir og uppsker góðan ávöxt. Safnið er honum til sóma og iðnum lesanda þessa dagana ljósskíma í annars dimmu flóðinu. Fínar sögur eftir fínan höfund.“
17. nóv. 2004
Jöklaveröld komin út
Jöklaveröld - Náttúra og mannlíf, í ritstjórn Helga Björnssonar, Egils Jónssonar og Sveins Runólfssonar er komin út. Hér er á ferðinni mikið rit um rannsóknir á Vatnajökli á 20. öld og jarðfræði Vatnajökulssvæðisins. All eru höfundar 13 talsins, sérfræðingar hver á sínu sviði. Með bókinni fylgir geisladiskur þar sem efni bókarinnar er kynnt með hjálp tölvutækninnar.